जनता समाजवादी पार्टी नेपालको केन्द्रीय समितिको चारदिने बैठक बुधबार सम्पन्न भएको छ । बैठकले निकै महत्त्वपूर्ण एजेन्डाहरु राजनीतिक, साङ्गठनिक एवं समसामयिक बिषयहरुबारे निर्णयहरु गरेको छ । सदन र सडकमा बलियो दख्खल राख्दै संगठन निर्माणका लागि जनअभियानमा होमिने केन्द्रीय समिति बैठकको निर्णय जनाइएको छ ।
जसपा नेपालको पाँच लाख क्रियाशील सदस्य पुर्याउने गरी केन्द्रीय सदस्य बैठकले पार्टीको लक्ष्य र कार्यदिशा निर्धारण गरेको हो ।
आगामी २०८४ को निर्वाचनसम्म सम्पूर्ण पार्टीपंक्ति नेतृत्वलाई संगठन निर्माणमा होमिन अध्यक्षको निर्देशन, आगामी निर्वाचनमा जसपा नेपाललाई बलियो शक्तिको रुपमा स्थापित गर्नेगरी ग्रास रुटका जनतामा होमिन अध्यक्षको आह्वान रहेको जनाइएको छ ।
पार्टी अध्यक्ष मा.उपेन्द्र यादवले प्रस्तुत गर्नु भएको राजनीतिक, सांगठनिक एवं जनअभियानको प्रतिवेदन राय सुझावसहित सर्वसम्मतले पारित भएको छ ।
बैठकले भूगोल, क्षेत्र, योग्यता, क्षमता र विविधताका आधारमा संगठन निर्माण एवं जनअभियानको लागि केन्द्रीय सदस्यहरुको कार्यविभाजन गरेको छ ।
यही भाद्र ९ गते काठमाडौंमा औपचारिक कार्यक्रम गरी पार्टी अध्यक्ष यादवले जनअभियानको उद्घाटन गर्नुहुनेछ ।
प्रथम चरणमा यो जनअभियान चार महिनाको लागि मंसिर मसान्तसम्मको लागि तोकिएको छ ।